Pananaliksik

• Ano ang Pananaliksik?

  • pagtuklas at pagsubok ng isang teorya para sa paglutas ng isang suliranin na nangangailangang bigyan ng kalutasan
  • isang makaagham na pagsisiyasat ng penomena, ideya, konsepto, isyu, at mga bagay na kinakailangang bigyang linaw, patunay, o pasubali
• Ayon kay Good (1963) ang pananaliksik ay

  • maingat, kritikal, disiplinadong inkwiri sa pamamagitan ng iba’t-ibang teknik at paraan batay sa kalikasan at kalagayan ng natukoy na suliranin tungo sa klaripikasyon at/o sa resolusyon nito
• Aquino (1974)

  • sistematikong paghahanap sa mahahalagang impormasyon hinggil sa isang tiyak na paksa
• Manuel at Medel (1976)

  • isang proseso ng pangangalap ng mga datos o impormasyon upang malutas ang isang partikular na suliranin sa isang siyentipikong pamamaraan
• Parel (1966)

  • isang sistematikong pag-aaral o imbestigasyon ng isang bagay sa layuning masagot ang mga katanungan ng mananaliksik
• E. Trece at J.W. Trece (1973)

  • isang pagtataka upang makakuha ng mga solusyon sa mga suliranin
  • pangangalap ng mga datos sa isang kontroladong sitwasyon para sa layunin ng prediksyon at eksplanasyon. 
• Calderon at Gonzales (1993)

  • Sistematiko at siyentipikong proseso ng pangangalap, pagsusuri, paglilinaw, pag-oorganisa, pag-unawa, at pagpapakahulugan ng isang datos na ngangailangan ng kalutasan sa suliranin
  • ekspansyon sa limitadong kaalaman at pagpapakita rin ng umuunlad na buhay ng tao
• Kerlinger (1973)

  • sistematiko, kontrolado, empirikal, at kritikal na imbestigasyon ng mga proposisyong hipotetikal tungkol sa inaakalang relasyon sa mga natural na pangyayari
  • sumusunod ito sa mga hakbang o yugto na nagsisimula, pagtulong sa mga suliranin, pag-uugnay ng mga suliranin sa mga umiiral na teorya
  • kontrolado at ang bawat hakbang na imbestigasyon ay nakaplano
• Atienza atbp (UP)

  • matiyaga, maingat, sistematiko, mapanuri, at kritikal na pagsisiyasat o pag-aaral tungkol sa isang bagay, konsepto, kagawian, problema, isyu, o aspekto ng kultura at lipunan
• San Miguel (1986)

  • isang sining tulad din ng pagsulat ng isang komposisyon sa musika
• Galang

  • isang makaagham na pagsisiyasat ng penomena, ideya, konsepto, isyu, at mga bagay na kinakailangang bigyang linaw, patunay o pasubali.
• Arrogante (1992)

  • Isang pandalubhasang sulatin na nangangailangan ng sapat na panahon paghahanda, matiyaga at masinsinang pag-aaral, maingat, maayos, at malayuning pagsulat para mayari at mapangyari itong maganda, mabisa at higit sa lahat, kapakipakinabang na pagpupunyagi
• PANIMULA/INTRODUKSYON - Dito tinatalakay ang mga sagot sa tanong na Ano at Bakit. Ano ba ang tungkol sa iyong pinagaaralang paksa at bakit kailangan pa itong pag-aralan.
• PAGLALAHAD NG SULIRANIN - Dito babanggitin ang layunin ng pananaliksik na maaring sa anyong patanong o simpleng paglalahad ng layunin. Iaanyo itong nangunguna ang pangkalahatang layunin na susundan ng 3 o higit pang mga tiyak na layunin.
• KAHALAGAHAN NG PAG-AARAL- Sa bahaging ito ay napapaloob ang mga pangkat ng tao na makikinabang sa gagawing pag-aaral. halimbawa: Mag-aaral, Mga Gurong nagtuturo ng mga wika, Mga Magulang, at Administrador.
• SAKLAW AT LIMITASYON NG PAG-AARAL - Ipinapakita sa bahaging ito ang lawak ng sakop ng ginagawang pag-aaral. Ipinapaalam din dito ang mismong paksa ng pag-aaral gayundin ang katatagpuan ng mga datos na kakailanganin, ang populasyon o bilang ng mga respondente na sasagot sa inihandang mga tanong.
• KATUTURAN NG MGA KATAWAGANG GINAMIT- Kinapapalooban ito ng mga terminolohiyang ginagamit ng mga mananaliksik na binigyang kahulugan at linaw upang mas madaling maunawaan ng mga mambabasa.
• BALANGKAS TEORETIKAL -Ilalantad ang teoryang pagbabatayan ng pagaaral. 

  • Sa teorya ring ito iaangkala ng mananaliksik ang sariling pagtingin sa paksang pinagaaaralan gayundin ang mga ideyang dapat palitawin sa ginawang pananaliksik.
  • Sa bahaging ito ng pananaliksik tinatalakay ang mga nagawa ng iba’t ibang manunulat at siyentipiko at iba pang eksperto sa isang partikular na larangan.
• BALANGKAS TEORETIKAL

  1. Binibigyang pagpapahalaga sa bahaging ito ang ilang mga batas, prinsipyo, paglalahat, mga konsepto, pagpapakahulugan at mga teorya na maaaring maiangkop sa ginagawang pag-aaral. 
  2. Ang paglalapat nito sa pag-aaral ay magiging malaking tulong upang mapatunayan o mapanubalian ang natuklasan ng mga naisagawa nang pagaaral.
• TEORETIKAL NA SALIGAN NG PAG-AARAL - Para sa mabisang pagkatuto ng wika, kailangang handugan ang mag-aaral ng mga awtentikong kagamitan sa pagkatuto na abot ng kanilang pangunawa, mga kagamitan sa pagkatuto na tinagurian ni Krashen (1982) na comprehensive input. Samakatuwid, tungkulin ng isang guro ng wika na paglaanan ang mga mag-aaral ng sapat na dami ng comprehensive input na magsisilbing mga modelo sa paggamit ng wika tungo sa pagpapalawak at pagpapadalisay ng kaalaman nila sa balarila.
• BALANGKAS KONSEPTUWAL

  -Ang balangkas konseptuwal ay nagpapakita kung ano ang nais na patunayan ng ginagawang pag-aaral. 

  -Ang ugnayan sa pagitan ng malayang baryabol at di malayang baryabol ay malinaw na naipakikita sa pamamagitan ng balangkas konseptuwal.
• DISENYO NG PANANALIKSIK

  Nililinaw sa bahaging ito ang ginamit na disenyo ng pananaliksik. Kadalasan deskriptiv-analitik dahil ito ang para sa mga baguhang mananaliksik dahil di ito nangangailangan ng paggamit ng masalimuot na gamit ng istatistik. Maaring suriin lamang ito ng mga datos o impormasyon na nakalap bunga ng isinagawang sarbey.
• RESPONDENTE

  Dito inilalahad ang eksaktong bilang ng mga sumagot sa inihandang sarbey kwestyuneyr. Inihahayag dito ang maikling profayl ng mga respondente gayundin at paano sila pinili.
• KALIGIRAN NG PAG-AARAL 

  -Ito ang bahagi ng pananaliksik na tumugon sa katanungang, “Ano ang ginawa ng ibang mananaliksik hinggil sa paksa? 

  -Mahalaga ang bahaging ito sa panungumbinsi sa mga magsasagawa ng kanilang pag-aaral na ang pananaliksik ay mahalaga. Sa madaling sabi, ang bahaging ito ay dapat na maingat na binuo. 

  -Ang bahaging ito ay kailangang maglaman ng mga sumusunod na impormasyon ukol sa paksa na pinagaaralan atb kung bakit ito ay laganap, seryoso at mahalaga.
• PAMARAANG PAMPANALIKSIK 

  -Dito inilalahad ang mga hakbang na ginagawa ng mga mananaliksik upang mabuo ang ginawang pag-aaral.
• INSTRUMENTO NG PANANALIKSIK

  Dito makikita ang ginamit na mga kwestyoneyr sa pagkalap ng mga impormasyon o datos. Ang instrumento sa pananaliksik ay maaaring sarbeykwestyoneyr, interbyu o panayam.
• ISTATISTIKANG TRITMENT NG MGA DATOS

  Inilalahad dito ang simpleng istatistik na magagamit matapos maitala ang mga naging sagot sa sarbey-kwestyoneyr sa bawat respondente. Sa deskriptiv-analitik maaaring gamitin ang pagpoporsyento/bahagdan matapos mai-tally ang numerikal na datos ng mga kwestyoneyr. Dito na magsisimulang suriin ang kinalabasan ng pagpoporsyento/ pagbabahagdan.
• MGA PROSESO/HAKBANG SA PANANALIKSIK 

  1. Pagpili ng paksa 
  2. Paghahanda ng balangkas 
  3. Paghahanda ng bibliyograpi 
  4. Pangangalap ng mga kinakailangang datos at materyal sa pananaliksik
  5. Pag-oorganisa ng nilalaman batay sa balangkas 
  6. Pagsulat ng pananaliksik 
  7. Pagrerebisa ng papel 
  8. Pagsulat ng pinal na papel